علق النجم تامر حسني على الحالة الصحية لنجله “آدم” بعد الأزمة التي مر بها مؤخرا، حيث كتب عبر حسابه على فيسبوك: “أنا مش عارف أشكركم إزاي على الكم الكبير من الدعوات اللي دعيتوها لشفاء آدم ابني، اللي جاتلي منكم هنا وعلى تليفوني وتليفونات كل المحيطين بيا، هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس”
اقرأ كمان: نجوم الفن أشرف زكي ومصطفى شعبان يشاركون في عزاء والدة عمرو الجنايني
وتابع تامر قائلاً: “بقولكم كده عشان تبقوا حريصين مع نفسكم أكتر ولولادكم، ومش كل سخونية تقولوا ده شوية برد وخلاص، لا روحوا اكشفوا كويس واعملوا سونار على البطن والزايدة مرة واثنين، عشان ساعات مش بيبان ولازم الدكتور يضغط بطريقة معينة، تقريباً أقوى شوية عشان يعرف، لأني سمعت كتير اليومين دول إن الزايدة خادعة”
واستكمل: “اطمنوا كذا مرة قبل لحظة انفجارها، عشان بجد مشاكل بتحصل بعدها كبيرة ومحزنة أوي، وحبيبي آدم عمل عمليتين صعبتين أوي عليه، وبدعواتكم مستنيين النتائج تكون خير يا رب، ويعدي مرحلة الخطر، يا رب، بحق (كن فيكون)”
وأضاف: “اشفيه وعافيه، هو وكل ولادنا، بس هو راجل وهيتحمل، وإن شاء الله ربنا يكرمه ويعافيه ويحفظه هو وإخوته، ويحفظ كل ولادكم يا رب، وأحب أقول تاني شكرا من كل قلبي على دعواتكم، أنا شايف قلب كل حد فيكم وهو بيدعي بصدق”
شوف كمان: هشام عباس يتألق في حفل عيد الأضحى الثاني على مسرح البالون
واختتم قائلاً: “متشكر أوي يا جماعة، شكرا لكل اللي اهتم وسأل عن ابني ودعاله هنا أو على التليفون، واللي طلعوله صدقات لشفائه من غير ما يعرفونا شخصياً، أنا مش لاقي كلام أشكركم بيه، وأنا برضو بدعيلكم وبقول لكم مثلها وأضعاف أضعافها، وربنا يحفظكم ويحفظ أولادكم، قادر يا كريم”